EXPOSICIÓN FOTOGRÁFICA ‘MISIÓN AFGANISTÁN’

10/Setembro/2026 Concellería de Deporte e Turismo
• 

O vindeiro luns 14 de setembro, ás 12:00 horas, inauguraremos no Salón de Actos do Concello de Xove a exposición fotográfica ‘Misión Afganistán’, organizada pola Subdelegación de Defensa en Lugo en colaboración co Concello de Xove.

A mostra reúne 30 imaxes, paneis informativos, uniformes e diverso material que permiten coñecer a realidade de Afganistán e o labor desenvolvido polas Forzas Armadas españolas durante a súa presenza no país, entre 2001 e finais de 2014.

  Unha exposición que pon en valor o traballo realizado en materia de asistencia sanitaria, seguridade, loxística, vixilancia e cooperación coa poboación afgá, así como a importancia da paz e da seguridade.

  Do 14 ao 27 de setembro.   En horario todos os días de 9:00h a 14:00h e de 16:00h a 20:00h.   Salón de Actos do Concello de Xove.

  Entrada aberta ao público.  

Animámosvos a achegarvos e coñecer de primeira man esta interesante exposición.

Obradoiro de Emprego 2026

08/Setembro/2026 Departamento de Emprego e Desenvolvemento Local
• 

A Xunta de Galicia acaba de aprobar o proxecto de obradoiro dual de emprego denominado SENDAS DE BURELA, CERVO E XOVE XII solicitado polo Concello de Cervo para desenvolver nos tres municipios.

A resolución de concesión indica os seguintes datos: -Data límite de inicio: 15/10/2026 -Data límite de remate: 14/07/2027 -Nº de alumnado: 20 -Horas: 1440 -Especialidade: Actividades auxiliares en viveiros, xardíns e centros de xardinaría (AGO0108)

No Concello de Xove contaremos con 6 persoas alumnas-traballadoras que aprenderán a profesión de auxiliar de xardinaría desenvolvendo os seguintes traballos: Saneamento, preparación de terreo e plantación de árbores autóctonas en zonas verdes. Actuacións en xardíns municipais. Acondicionamentos e mantemento de espazos municipais. Actividades de mellora medioambiental. Mantemento de rutas de sendeirismo.

As persoas interesadas en formar parte do alumnado-traballador que cumpran os requisitos para acceder ao obradoiro de emprego, deberán acudir inmediatamente (con cita previa) á oficina de emprego de Burela e cubrir a súa solicitude.

O Concello de Cervo será o encargado da selección, tanto do persoal alumno-traballador coma de dirección, docencia e xestión do Obradoiro SENDAS DE BURELA, CERVO E XOVE XII, polo que para máis información as persoas interesadas poderán contactar directamente.

Rehabilitación da Pista Polideportiva

07/Setembro/2026 CONCELLO DE XOVE
• 

O Concello culmina a rehabilitación e mellora da pista polideportiva do parque de Xove cun investimento de 18.000 euros.

O Concello vén de rematar os traballos de rehabilitación e mellora da pista polideportiva do parque de Xove, unha actuación moi necesaria debido ao desgaste que experimentaba polo uso intensivo da mesma e do paso do tempo.

A intervención consistiu nunha reparación integral do peche perimetral e da estrutura soporte da pista multideportiva 3x3, así como na renovación completa do pavimento deportivo de céspede sintético, a colocación de canastas novas e a mellora na rede de protección.

Optouse por unha reparación integral da instalación debido a que o uso constante da infraestrutura representaba un risco significativo para os usuarios e facía inviable a práctica deportiva de maneira segura e adecuada, o que obrigou a acometer unha actuación completa en lugar dun simple tratamento superficial.

A valoración económica deste proxecto ascende a 18.000 euros e a actuación está financiada ao abeiro dun convenio para subvención directa polos ingresos percibidos pola Xunta de Galicia derivados do Imposto de Compensación Ambiental.

Con esta obra, o Concello reforza o seu compromiso coa mellora das infraestruturas deportivas municipais e coa creación de espazos seguros, accesibles e de calidade para a práctica do deporte e o lecer da cidadanía, especialmente da mocidade que fai un uso habitual desta instalación do parque de Xove.

Xove clausura o programa Xove Concilia Verán 2026

03/Setembro/2026 CONCELLO DE XOVE
• 

Xove clausura mañá venres, 4 de setembro, o programa Xove Concilia Verán. Este servizo municipal ofreceu desde o  primeiro día das vacacións escolares, 22 de xuño, apoio ás familias con necesidades de conciliar a vida laboral e familiar.

No Xove Concilia Verán participaron máis de 60 nenas e nenos de entre 3 a 10 anos, en horario de 8:45 a 14:00 horas, e atendéronse ás necesidades de 57 familias que precisaron de axuda para conciliar a súa vida laboral coa atención á familia, ó longo de todo o período estival de vacacións escolares.

O servizo está a cargo da empresa Sonaga Gestión S.L. e é cofinanciado pola Consellería de Política Social e Igualdade e polo Plan Corresponsables. Ministerio de Igualdad. Gobierno de España.

Onte, 2 de setembro, o Alcalde e a Concelleira de Servizos Sociais, Sanidade, Muller e Políticas de Igualdade do Concello de Xove, reuníronse cos participantes de Xove Concilia Verán para agradecerlles a súa participación e facerlles entrega dun agasallo de despedida. 

Desde o Concello de Xove agradecen a participación e a confianza das familias no Xove Concilia Verán 2026, así como o labor da coordinadora e das monitoras encargadas de facer posible a programación estival.

Festas Patronais de Portocelo 2026

02/Setembro/2026 CONCELLO DE XOVE
• 

Portocelo toma o relevo das Festas de Xove con tres días de celebración na honra de Nosa Señora.

Unha vez rematadas as festas patronais de Xove, a celebración continúa esta fin de semana na parroquia de Portocelo, que se prepara para vivir tres intensas xornadas festivas na honra da Nosa Señora. Os días 4, 5 e 6 de setembro, a música, a gastronomía e a tradición volverán ser protagonistas nun programa pensado para tódolos públicos.

As festas darán comezo o venres 4 de setembro ás 21.00 horas coa celebración da Festa da Paella de Marisco ao estilo Portocelo. Nesta ocasión, o encargado de cociñar e servir a paella será o famoso tiktoker zamorano El Papi, que achegará o seu particular estilo a esta proposta gastronómica, que á vez estará amenizada pola Asociación Cultural Saíñas.

A música empezará ás 23.00 horas cunha gran verbena, que contará coa actuación do Dúo Musical La Hora Bruja e do Grupo Lecer.

O sábado 5 de setembro, as bombas de palenque, ás 10.00 horas, anunciarán o comezo dunha nova xornada de festa.

Os actos relixiosos terán lugar ás 13.00 horas, cunha misa solemne na igrexa de Vilachá, seguida dunha sesión vermú a cargo do Dúo Crazy no campo da festa de Portocelo.

Xa pola noite, a música volverá ser a gran protagonista cunha verbena que contará coas actuacións das Orquestras Charleston Big Band e Cinema. A xornada festiva do sábado rematará coa música da Disco Móbil Conxuro.

Servizo especial de autobuses.

Co obxectivo de facilitar os desprazamentos e favorecer que todas as persoas poidan gozar da festa con seguridade no desplazamento, o sábado haberá servizo especial de autobuses desde Viveiro, Xove, San Cibrao e Burela.

O programa festivo pecharase o domingo 6 de setembro cunha gran sesión vermú prolongada, que dará comezo ás 13.30 horas e que estará amenizada polo Dúo Primera Línea.

A organización destas festas corre a cargo da Asociación de Festexos A Medorra, que traballa incansablemente ao longo de todo o ano na organización de outros eventos para facer que todos os veciños e veciñas da parroquia e visitantes poidan desfrutar destas festas á Nosa Señora e como non, agradecen a toda a veciñanza e empresas a súa colaboración.

O Concello de Xove, como colaborador nestas grandes festas, convida a toda a veciñanza e ás persoas que se acheguen desde outros municipios a participar nestas festas de Portocelo e a gozar dunha fin de semana na que a tradición, a gastronomía e a música volverán encher de ambiente a parroquia.

As festas de Portocelo supoñen así a continuidade do calendario festivo do municipio despois das celebracións patronais de Xove, mantendo vivo o espírito festivo durante este primeiro fin de semana de setembro e dando un remate forte a un verán intenso e cheo de festas por todo o concello.

O Concello de Xove abre o prazo de matrícula para novo alumnado da escola municipal de música para o curso 26-27

01/Setembro/2026 Departamento de Cultura e Comunicación
• 

O Concello de Xove informa de que hoxe, 1 de setembro, abre o prazo de solicitude de matrícula para o novo alumnado que queira formarse musicalmente na Escola Municipal de Música de Xove de cara ao curso 2026-2027.

As persoas interesadas poderán presentar a súa solicitude do 1 ao 30 de setembro, achegándose ao Rexistro Municipal, onde poderán cubrir e entregar o correspondente impreso de inscrición.

Unha vez rematado o prazo de presentación de solicitudes, o luns 5 de outubro publicarase a lista de alumnado admitido e admitida para o vindeiro curso 2026-2027.

Novidade para este curso: reforzo da educación vocal

Para este novo curso, ademais de manter as materias e actividades habituais da Escola Municipal de Música, o Concello de Xove quere reforzar especialmente a educación vocal, ampliando a oferta para que esta formación non estea dirixida unicamente ao alumnado infantil.

Así, como novidade, a proposta estará tamén orientada ao alumnado adulto, coa finalidade de crear un espazo no que as persoas participantes poidan desenvolver as súas capacidades vocais e, sobre todo, formar parte dunha actividade coral en grupo.

Deste xeito, a Escola Municipal de Música de Xove quere abrir as súas portas a todas aquelas persoas da localidade que gosten de cantar e teñan inquedanza por desenvolver esta afección, ofrecéndolles a oportunidade de facelo de maneira colectiva e acompañada dende este mesmo curso 2026-2027.

Desde o Concello destacan que esta nova proposta pretende seguir facendo da Escola Municipal de Música un espazo aberto á participación da veciñanza, á formación e ao goce da música, creando novas oportunidades para achegarse á práctica musical independentemente da idade.

O Concello de Xove anima, polo tanto, a todas as persoas interesadas en iniciar ou continuar a súa formación musical a presentar a súa solicitude dentro do prazo establecido e, moi especialmente, a aquelas persoas adultas afeccionadas ao canto que queiran descubrir a experiencia de formar parte dun grupo coral.

XV Encontro de Palilleiras

01/Setembro/2026 Turismo, Investigación Social e Muller
• 

Ábrese o prazo de inscrición ata o 30 de setembro para participar no XV Encontro de Palilleiras “Coas nosas mans” do Concello de Xove.

SOLICITUDE DE INSCRIPCIÓN ASOCIACIÓNS

SOLICITUDE DE INSCRIPCIÓN POSTOS VENDA

Actuacións da Xunta de Galicia para a evolución tecnolóxica da Tdt en Xove

01/Setembro/2026 CONCELLO DE XOVE
• 

A Xunta de Galicia puxo en marcha unha serie de actuacións para realizar os cambios necesarios e cumprir coa Fase 1 do proceso de evolución tecnolóxica da TDT nos centros de extensión de cobertura do sinal de televisión dixital terrestre.

No Concello de Xove, hoxe realizáronse actuacións nos seguintes lugares:

• A RIGUEIRA (SAN MIGUEL):• A Abelá • A Ponte do Carro• Ferrol• Labradela• Lamas• O Canaledo• O Pazo• O Prado Vello• San Vicente• O Torrillón• Soutorredondo• Vila
• O MONTE (SANTO ISIDORO):• As Cancelas
• XUANCES (SAN PEDRO)* Camba* Campo Susao* O Cruceiro* Pereiraboa
• PORTOCELO (SAN TIRSO)* Canelas* Portocelo* Villalpol

 Estas actuacións forman parte do proceso de adaptación e evolución tecnolóxica da rede de TDT.